أحياناً
ممكن تكون كتابة المذكرات فكرة مريحة لناس
فكرة أنو نفضي كل شي ببالنا عالورق بدون ما حدا يقرأ بتشبه فكرة نكتب رسالة للمجهول ونحطها بقنينة ونرميها بالبحر أو المحيط حتى يحملها الموج لبعيد، يمكن يفتحها شخص عم يتمشى عالشط ببلاد تانية ما منعرفها، بتحكي لغة ما منعرفها، ويفكرها أحجية لكنز مدفون بكهف مهجور ..
الإنسان من جوا وادي سحيق متل عمق البحر يلي لو مهما بدا هادي عالسطح بيبقى في من جوا أفكار ومشاعر غريبة ومتناقضة بأوقات، ومفهومة ومنسجمة بأوقات تانية ..
وأحياناً
ممكن تكون كتابة المذكرات فكرة مؤلمة لناس تانيين
لأنها بتحفظ ذاكرة لأشياء بدنا ننساها ونتجاوزها، وما بدنا حدا يلاقيها عالشط بمكان ما منعرفه، بدنا يلي حوالينا يشوفونا ويحسوا بوجودنا
وأحياناً
في نوع تالت من الناس
ما بيكتبوا مذكراتهم لأنو ما بدهن حدا يقرأ
ولا لأنو بدهن يلي حواليهن يحسوا فيهن
لأنو الحبر عالورق بيبهت مع الوقت
والحكي بينسوه الناس مع الوقت
بس الذاكرة كيف بتنسى؟!
جبلة 24 أيلول 2021
